Nadale

(A Nadalinu Cau)
 
Toccade, campanas, toccade:
-Est nadu, est nadu Gesusu!
Toccade, sonade 'e piusu,
sos frades, sas sorres giamade.
 
Giamade su negru, su biancu,
su grogu, su malu, su 'onu.
Cantade:-Est ora 'e perdonu!
Su coro si fattat prus francu.
 
Si lassent sos òdios, sa gherra;
sunt tantos sos ohis terrenos!
Prus bonos, prus santos, serenos
in paghe si vivat in Terra.
 
Ite 'alet intantu gherrare,
aggiungher dolore a dolore?
Est mezus chi regnet s'Amore,
chi pottat tottue triunfare.
 
Mirade, mirade sa grutta,
est pòvera, est ùmile tantu!
Ne oro, ne seda, ne ispantu
ma solu un'istalla derrutta.
 
Mirade a Zuseppe, a Maria,
mirade sos bonos pastores,
s'istella chi mandat lugores,
s'istella chi mustrat sa via.
 
S'abberzat su coro a sa lughe
pro sempre, pro tottu in su Mundu;
su sulcu s'abberzat profundu,
unidos in bratzu a sa rughe.
 
Est Cristos su Re soberanu.,
su babbu, su frade, s'amigu,
su sole, sa luna, su trigu,
su fogu, s'aera, sa manu.
 
Umpare, abbratzados, un'innu
si cantet de glòria, d'osanna;
s'abberzat, s'abberzat sa gianna
a Gesus, a Cristos pitzinnu.
 
Prus gherras, ne famen, ne male;
sa mente in Cristos siat fissa!
Si fattat sintzera promissa:
-Da' oe est sempre Nadale!

Antoninu Rubattu (Tonino Mario Rubattu) Copywrite 2013

WebMaster Franco Piga (Romana 'SS') - Sito online dal 1 settembre 2013