Poesia

E torras...mi tentas...proite
s’affianzu non chirco o cunfortu?
 
Non torrat s’alenu a su mortu
s’aeret su sole a cumpanzu
non torrat s’alenu a su mortu.
 
Ma torras...s’appentu est crudele!
Ispinas mi carras, non rosas!
 
In flores siccados su mele
sas abes non chircant divinas
in flores siccados su mele.
 
Sa frina chi m’’attis pro gosu
est frama ch’abbivat tempesta.
 
Campanas non sonant a festa
si pranghent sos fizos sa mama
campanas non sonant a festa.
 
Che puntos mi mira in sa chea
sos ojos avvesos a risu.
 
S’est sicca sa ‘ena ‘e s’Idea
umores non chirches in pojos
s’est sicca sa ‘ena ‘e s’Idea.
 
Cun foddes mi nas de chircare
frailes ch’attarzent su ferru.
 
Addaghi si nd’intrat s’ijerru
chie gosat che in beranile
addaghi si n’intrat s’ijerru?
 
Ma torras...cun risu ‘e culumba
e finas mi faghes s’ojittu!
 
S’est ch’apo ambos pes in sa tumba
prit’est chi m’illudis, Reina,
s’est ch’apo ambos pes in sa tumba?

Antoninu Rubattu (Tonino Mario Rubattu) Copywrite 2013

WebMaster Franco Piga (Romana 'SS') - Sito online dal 1 settembre 2013